ဇူလိုင် ၂၆ – ၂၀၂၅
SS (VOM)
ကရင်ပြည်နယ်က လှိုင်းဘွဲ့မြို့နဲ့ ဘားအံမြို့မှာ သံလွင်မြစ်ရေ မြင့်တက်လာတဲ့အတွက် ဒေသခံတွေ ဘေးလွတ်ရာကို စတင်ရွှေ့ပြောင်းနေရတယ်လို့ ပရဟိတ အသင်းအဖွဲ့တွေဆီက သိရပါတယ်။
မနေ့ ဇူလိုင် ၂၅ ရက်၊ မနက် ၁၀ နာရီဝန်းကျင်ကစပြီး လှိုင်းဘွဲ့မြို့နယ်၊ ရွှေဂွန်းကျေးရွာမှာ သံလွင်မြစ်ရေ မြင့်တက်လာတာကြောင့် အဲဒီ ကျေးရွာက ရွှေပြည်တော်ရပ်ကွက်နဲ့ ရွာသစ်ရပ်ကွက်ရှိ မြေနိမ့်ပိုင်းရှိ နေအိမ်တွေထဲ ရေဝင်ရောက်မှု ဖြစ်ပွားနေတယ်လို့ သိရပါတယ်။
ဒါကြောင့် ရွှေဂွန်းနယ်မြေ မီးသတ်စခန်းမှ သန္ဓေမီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေ စုပေါင်းပြီး အိမ်ထောင်စုတွေကို ရေဘေးလွတ်ရာကို ကူညီ ပြောင်းရွှေ့ပေးခဲ့တယ်လို့ သိရပါတယ်။
“လောလောဆယ် ရေဘေးသင့် ပြည်သူတွေကို ရွှေဂွန်းအထက် ဘုန်းတော်ကြီးကျောင်းကို ရွှေ့ပြောင်းပေးထားပါတယ်။ အခုအချိန်က ရေတက်ရက်နဲ့ ကြုံနေတော့ ရေအတက်မြန်နေတယ်။ နောက်ရက်တွေမှာလည်း ရေထပ်တက်နိုင်ခြေ ရှိနေတော့ မြစ်ကမ်းဘေးနဲ့ မြေနိမ့်ပိုင်း နေထိုင်သူတွေအနေနဲ့ ကြိုတင် ပြင်ဆင်ထားသင့်တယ်” လို့ ကူညီကယ်ဆယ်ရေး လုပ်ဆောင်နေသူက ပြောပါတယ်။
အလားတူ ဘားအံမြို့မှာလည်း ဒီကနေ့ မနက် ၆ နာရီဝန်းကျင်မှ စတင်ကာ မိုးသည်းထန်စွာ ရွာသွန်းပြီး သံလွင်မြစ်ရေ မြင့်တက်လာတာကြောင့် မြေနိမ့်ပိုင်း နေရာတွေဖြစ်တဲ့ အမှတ် (၁) ရပ်ကွက် အုတ်ဖိုလမ်းနဲ့ အမှတ် (၅) ရပ်ကွက်၊ အိမ်တိုင်ကုန်း၊ ဆယ်အိမ်စု၊ မိဇံ စတဲ့ ကျေးရွာတွေက နေအိမ်တွေအတွင်း ရေဝင်ရောက်မှု ဖြစ်ပွားလျက်ရှိတယ်လို့ သိရပါတယ်။
ဒါကြောင့် ဘားအံခရိုင် မီးသတ်စခန်းမှ သန္ဓေမီးသတ်တပ်ဖွဲ့ဝင်တွေ၊ သက်ဆိုင်ရာ အဖွဲ့အစည်းတွေ ပူးပေါင်းမှုနဲ့ အိမ်ထောင်စုတွေကို ရေဘေးလွတ်ရာ အမှတ် (၁) ရပ်ကွက်ရှိ ရပ်ကွက်ရုံးကို ယာယီ ရွှေ့ပြောင်းပေးခဲ့တယ်လို့ သိရပါတယ်။
“ရေအတက်က တအားမြန်နေတယ်။ ဘားအံမြို့ ရေပေါ်စျေးထိပ်နားအထိ ရေရောက်နေပြီ။ ရေပေါ်ဈေးနားက အင်းလေးလမ်းမှာလည်း ရေပြည့်နေပြီ။ ဆင်စွယ်နဲ့ ဖားစည်အထိကို ရေရောက်နေပြီ။ ရေကတော့ အခုထိ တက်ကောင်းနေတုန်းပဲ။ ဘားအံ – မြိုင်ကြီးငူလမ်းပိုင်း၊ ဂျို့ချောင်းရွာနဲ့ ရွှေဂွန်းကျေးရွာကြားက လမ်းမပေါ်မှာလည်း ရေကျော်နေပြီ။ လတ်တလော ရေအခြေအနေက မှန်းဆရခက်ပါတယ်။ ပင်လယ်ရေထရက်ရက်နဲ့ ဆုံရင် စိတ်ပူရတယ်” လို့ ဒေသခံ တယောက်က ပြောပါတယ်။
မိုးလေဝသနှင့် ဇလဗေဒညွှန်ကြားမှု ဦးစီးဌာနရဲ့ ဒီကနေ့ ဇူလိုင် ၂၆ ရက်၊ မနက် ၇ နာရီခွဲအချိန် ထုတ်ပြန်ချက်အရ သံလွင်မြစ်ရေဟာ ဘားအံမြို့မှာ မြို့ရဲ့ စိုးရိမ်ရေမှတ်အထက် ၃ ပေခွဲခန့် ကျော်လွန်နေပြီး နောက်တရက်အတွင်း ၁ ပေခန့် ဆက်လက် မြင့်တက်လာနိုင်ကာ အဲဒီမြို့ရဲ့ စိုးရိမ်ရေမှတ်အထက် ဆက်လက် တည်ရှိနိုင်တယ်လို့ သိရပါတယ်။
ဒါအပြင် ဒီကနေ့၊ ညနေ ၄ နာရီအချိန် ထုတ်ပြန်ချက်မှာလည်း ကပ္ပလီပင်လယ်ပြင်နဲ့ ဘင်္ဂလားပင်လယ်အော်တို့မှာ မုတ်သုံလေ အားကောင်းရာမှ အားအလွန် ကောင်းနေတဲ့အတွက် ကရင်ပြည်နယ် အပါအဝင် နေပြည်တော်၊ ပဲခူးတိုင်း၊ စစ်ကိုင်းတိုင်း (အထက်ပိုင်း)၊ ကချင်ပြည်နယ်၊ မွန်ပြည်နယ်၊ ရခိုင်ပြည်နယ်နဲ့ ရှမ်းပြည်နယ် (မြောက်ပိုင်းနဲ့ အရှေ့ပိုင်း) တို့မှာ မနက်ဖြန် ဇူလိုင် ၂၇ ရက်၊ မနက်ပိုင်းအထိ နေရာကွက်ပြီး မိုးကြီးနိုင်ကာ ရွာရန်ရာနှုန်းပြည့် ဖြစ်တယ်လို့ သိရပါတယ်။
အလားတူ မန္တလေးတိုင်းနဲ့ စစ်ကိုင်းတိုင်း (အောက်ပိုင်း) တို့မှာ နေရာကျဲကျဲ၊ မကွေးတိုင်းနဲ့ ကယားပြည်နယ်တို့မှာ နေရာစိပ်စိပ်နဲ့ ကျန်တိုင်းနဲ့ ပြည်နယ်တို့မှာ နေရာအနှံ့အပြား မိုးထစ်ချုန်း ရွာသွန်းနိုင်တယ်လို့ သိရပါတယ်။
မိုးတိမ်တောင် ဖြစ်ပေါ်မှုအနေနဲ့ ရန်ကုန်တိုင်း၊ ပဲခူးတိုင်း၊ မကွေးတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နဲ့ ရှမ်းပြည်နယ် (မြောက်ပိုင်းနဲ့ အရှေ့ပိုင်း) တို့မှာ မိုးတိမ်တောင်တွေ ဖြစ်ထွန်းလျက်ရှိတယ်လို့ သိရပါတယ်။
အဆိုပါ မိုးတိမ်တောင်တွေ ရွေ့လျားရာ နေရာတလျှောက်မှာ မိုးရွာသွန်းခြင်းနဲ့အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်းနဲ့ မိုးသီးကြွေခြင်း စတဲ့ မိုးလေဝသဖြစ်စဉ်တွေလည်း ဖြစ်ပေါ်နိုင်တဲ့အတွက် ကြိုတင်သတိပြုကြဖို့ လိုအပ်တယ်လို့ သိရပါတယ်။
ဒါအပြင် မြန်မာ့ကမ်းရိုးတန်း တလျှောက်နဲ့ ကမ်းလွန်ပင်လယ်ပြင်တို့မှာလည်း ရံဖန်ရံခါ မိုးသက်လေပြင်းတွေ ကျရောက်ပြီး လှိုင်းကြီးရာမှ လှိုင်းအလွန်ကြီးနိုင်တယ်လို့ သိရပါတယ်။
မိုးသက်လေပြင်းကျစဉ် ရေပြင်/မြေပြင်လေဟာ တနာရီကို ၃၅ မိုင်ကနေ မိုင် ၄၀ အထိ တိုက်ခတ်နိုင်ပြီး မြန်မာ့ကမ်းရိုးတန်း တလျှောက်နဲ့ ကမ်းလွန်ပင်လယ်ပြင်တို့မှာ လှိုင်းအမြင့် ၁၀ ပေမှ ၁၄ ပေခန့်အထိ ရှိနိုင်တယ်လို့ သိရပါတယ်။
နောက်နှစ်ရက်အတွက် ခန့်မှန်းချက်အနေနဲ့ ပဲခူးတိုင်း၊ စစ်ကိုင်းတိုင်း (အထက်ပိုင်း)၊ တနင်္သာရီတိုင်း၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နဲ့ ရှမ်းပြည်နယ်တို့မှာ မိုးပိုနေဦးမှာ ဖြစ်တယ်လို့ သိရပါတယ်။
နေပြည်တော်နဲ့ အနီးတဝိုက်၊ ရန်ကုန်မြို့နဲ့ အနီးတဝိုက်အတွက် မနက်ဖြန်မနက်အထိ ခန့်မှန်းချက်အနေနဲ့ မိုးတကြိမ်၊ နှစ်ကြိမ် ထစ်ချုန်းရွာနိုင်ပြီး ရွာရန်ရာနှုန်းပြည့် ဖြစ်တယ်လို့ သိရပါတယ်။
မန္တလေးမြို့နဲ့ အနီးတဝိုက်အတွက် မနက်ဖြန် မနက်အထိ ခန့်မှန်းချက်အနေနဲ့ နေရာကွက်ကျား မိုးထစ်ချုန်းရွာနိုင်ပြီး ရွာရန်ရာနှုန်းပြည့် ဖြစ်တယ်လို့ သိရပါတယ်။
Photo – CJ/MFSD
VOM Telegram Channel: https://t.me/VOMNEWS2023/14974?single
VOM Viber Channel: https://invite.viber.com/…
VOM Youtube Channel: https://www.youtube.com/channel/UCMHge_I_r2t4sISomPm392g
VOM Website Link: https://voiceofmyanmarnews.com/….
